Deché-delé
L’i-a ôtyè ke mè trakachè du l’i a dza grantin. I dyon ke lè fèmalè chon pye fridàjè tyè lè j’omo è ke l’è j’omo l’an totavi tru tsô, ke dyon.
L’è poutithre oun’afére dè mouda, ma on vê din lè vèyè intrè prèkô è grô bounè, di damè prà pye dèvihyiè tyè lè moncheu. Din lè bal «mondin» l’è parê. Po danhyi, cherè bin d’ithre a l’éje.
Achebin, on vê l’omo, inbortoyi din on grô vèchton, la gravata charâye tantyè i j’oroyè, di tsôthè, di pyalè, di botè bin kotâyè. I dèpourè dè totè pâ. Adon ke madama frebiyè din na galéja roba kourta, dègolâye prèvon, lè j’èpôlè dèvouâlâyè, di pititè botè lêrdjirè. Li, l’a pâ tru tsô.
Ô, l’è pâ ke l’é pitchi di j’omo, l’an bin di j’ôtrè libertâ, chè ratrapon totêvi. Pu, chè tràvè ke di kou i chon bin utilo; kan madama l’a frê i pi… i châ yô alâ…