Din on piti velâdzo, in Grevire, Tréje, ouna boun’anhyanna vinyê d’intêrâ che n’omo; on viyo dè vouètant’è think’an, l’i dejan Luvi a Mark.

Dutrè dzoua apri l’intêrèmin, ouna dè chè vejenè l’è vinyête la trovâ: «Ma poura Tréje, tyin mâlà, m’in féjo bin mô dè tè. Ora t’i cholèta pêr-inke. Ma, di-mè, kemin è-the arouvâ?»

«Bin, te vê, iro apri inkotyi le goutâ, l’è dèmandâ a Luvi d’alâ apri de la chalârda on kurti. Demi-àra apri irè onko pâ rèpri. L’é kan mimo j’ou on bokon dè pochyin, chu jelâye avô, vouityi par tyè ke n’in d’irè, bringâvè pâ dinche dè kothema. L’è inke ke l’é trovâ me n’omo, èthindu ou mitin di chalârdè, ne terivè nè pi nè tsanba mé. Te pou mè krêre, irè mouâ!»

«Ma poura tè, tyinta chorèprêcha! Chin t’a prou chure bayi on pechin kou ou kà. Adon apri, tyè â-the fê?»

Bin, ma-fi, l’é fê de la chalârda i ri rochètè.

Moncheu Bourrier ke m’â kontâ la fâcha in franché porè poutithre la kontâ mimo l’an ke vin. I prin di kour dè patê.

Anne Marie Yerly