Katro linvouè

Nouthon payi l’è bin vouêthâ. L’i a dè tyè batoyi, babiyi, dzêrgounâ, brathotâ, dèbyotâ, papotâ è menâ lè mamàlè din prà dè linvouè. Dou franché, dou reman, dè l’italyin è dou tutche. In dè-pye dè chin, l’i a,bin chure ti lè patê. Chin y fâ on pechin mèhyo, kan on chè tràvè intrè Chuiche dè totè lè kotsè.

Mé chu léchia dre ke, mimamin ou Konchèye Fèdèral, l’an keminhyi a dèvejâ, vo lécho dèvenâ: èbin, in anglé! Bin chure ke chin y gânyè dou tin. Vo chédè prà le tin ke fô po prindre na dèchijyon, din chi payi. L’anglé va-the rakuchi la dichkuchyon? Pâ chure!

Lè boutekè, lè gajètè, lè j’anonthè a la radio è a la télé, chon gayâ totè din ha linvoua. Vo j’alâdè por atsetâ kotyè nipè a bon matchi, ou tin di «soldes», vo l’i trovâdè tyè di j’âyon mônè: «Sale».

Ma vouê, i ché prà…